Welkom beej de sectie Limburgs van Laevende Tale, de vereiniging van taaldocente in Nederland.

 

— Liever lezen in het Nederlands? Klik dan op deze link. —

 

De vereiniging Laevende Tale is ein gewaardeerde gesjprekspartner veur politici, beleidsmakers en sjoeëlbesjteure. Door ’t Limburgs zichbaar te make as sectie binne Laevende Tale gaeve weej dees taal en zien sjpraekers ‘ne grottere sjtum in ’t landelik debat en euverlegk.

Oetgankspunt van Laevende Tale Limburgs is det mieërtaligheid ‘n riekdom is, dae allerlei veurdeile ken baeje aan persoeëne die mieërtalig opgreuje. Ozzen sectie benaodruk deurum ’t belang um thoestale van lieërlinge ’n plek te gaeve in ’t ongerwies. Det geldt zoewaal veur ’t Limburgs es auch veur anger thoestale.

Daonaevebeej ongersjteunt Laevende Tale Limburgs ’t gebroek van mieërdere tale (waoronger ’t Limburgs) in de kingeropvang, de zurg, de werkvloer, ’t toerisme, thoes en online. In dees umgaevinge ken zoewaal actieve es passieve kennis van ’t Limburgs (loestertaal) ingezatte waere.

’n Belangriek doel van Laevende Tale Limburgs is um professioneel educatief materiaal te ontwikkele, waodoor geïnteresseerde en belanghebbende Limburgs kenne liere. Dink heejbeej aan niejkommers in Limburg, maar auch aan minse die in Limburg opgegreuid zien maar ’t Limburgs noeëjts actief gelieërd hebbe.

Um os doelsjtellinge te bereike, is ’t van belang det Laevende Tale Limburgs zoevuuel meugelik lede haet. Haes doow, of haet diene organisatie interesse um lid te waere? Meld dich den aan via de algemeine website van Laevende Tale of klik ieërs op dees link veur mieër informatie.

 

* Umdet ’t veur Laevende Tale Limburgs van groeët belang is um ’t gebroek van ’t Limburgs te sjtimulere, hebbe weej besjlaote um ’n vreeje sjpelling op dees website te hantere. Det beteikent det iddere auteur vreej is um te sjrieve in welk dialek hae/het wult, en op welke menier.